د برېتانیا حکومت اعلان کړی چې د کوچنیو کښتیو دوه چلوونکي د لومړي ځل لپاره د «په سمندر کې د خلکو د ژوند له خطر سره مخ کولو» په نوم د نوي جرم له مخې زندان ته محکوم شوي دي. دغه قانون د برېتانیا د سرحدي امنیت د قانون په چوکاټ کې نافذ شوی دی.

۳۲ کلن افغان وګړی محمد تاجک د جون په ۱۰مه د کینټربري عالي محکمې له خوا په دوو کلونو بند محکوم شو.

د محکمې د اسنادو له مخې، نوموړي د جنورۍ په ۱۷مه یوه کوچنۍ کښتۍ چې ۷۵ کډوال پکې سپاره وو، د فرانسې له ساحل څخه د برېتانیا د اوبو پر لور رهبري کړې وه. دغه کښتۍ د برېتانیا د سرحدي امنیت د قوماندانۍ له خوا ودرول شوه. د کډوالۍ ادارې ځانګړو افسرانو د ډرونونو د انځورونو او ویډیويي شواهدو په مرسته هغه د کښتۍ د چلوونکي په توګه وپېژانده.

ویل کېږي چې تاجک تر پېژندل کېدو وروسته هڅه وکړه خپل رول پټ کړي او د کښتۍ له انجن څخه په لیرې کېدو سره یې د انجن د بندېدو لامل شو. له همدې امله کښتۍ په سمندر کې بې‌لارې شوه او د ۷۵ سپرلیو ژوند له جدي خطر سره مخ شو.

هغه برېتانیا ته له رسېدو وروسته په یوه د منلو مرکز کې وساتل شو او بله ورځ د کینټ پولیسو د کډوالۍ ادارې په همکارۍ ونیوه. تاجک د مارچ په ۴مه د «په سمندر کې د خلکو د ژوند له خطر سره مخ کولو» او «له قانوني اجازې پرته برېتانیا ته د ننوتلو» په جرمونو اعتراف وکړ.

د برېتانیا حکومت ویلي چې تر اوسه ۱۴ کسان د دې نوي جرم له مخې تورن شوي دي. دغه قانون د جنورۍ له میاشتې راهیسې نافذ شوی او هغو کسانو ته چې د مانش کانال د اوښتو پر مهال د نورو ژوند له خطر سره مخ کوي، تر شپږو کلونو پورې د بند سزا ټاکي.